كل سنة وكلكم بخير الربيع قرب يعني الفسيخ يعني الرنجه والبصل واديها يا مزة
بس حالات كتير بتحصل فيها تسمم بعد الشر من الفسيخ بتاع برا
طب نعمل ايه والاكله دي لذيذة ولذيذة جدا ومنقدرش نقاومها
تعالى معايا يا قمراية انتي وهي وانا اقولك ازاي تعمليه فى البيت
واحلى واطعم وانضف مليون مرة من برا ودي اهم حاجه طبعا صحتنا وصحة اولادنا
بصي بقى انا مش هفتكس ولا اي حاجه وياريت بلاش حد يفتكس فى بهارات دي
طريقة ستي وعلى الاصل دور
هاتي 4 كيلو سمك بوري وكيس ملح وزيت وشطة وكتريها شوفتي مقاديرنا سهله وبسيطة ازاي
نبدأ بقى بسم الله نفرد السمك على ورقة جورنان لمدة 24 ساعه كاملة فى الهوا
محدش يغطيه خالص بأي حاجه
وبعد كده هاتي قطعه قماشه قطنه وياسلام لو فانلة جوزك او ابنك القطن اللى ملهاش
لزمة عنده دي بقى تنضفي بيها السمكه كويس من برا فقطططط محدش يفتحها طبعا
وتنضفي كمان الخياشيم كويس اوى من الدم وكده
وهاتي طبق وحطي فيه كيس الملح والشطة حامية وكتيرة (عشان متجبش دود ) ويتقلبوا سوا
كويس
وادهني بقى الجسم كله والدماغ بالزيت عشان يمسك فيه الملح والشطة فى الجسم كله يعني
كأنك بتقلبيها فى دقيق مثلا قبل القلي
ونيجي للرأس بقى بتاعت السمكة ونحط الملح بالشطة من جوا الخياشيم ونملاها على الاخر تمام
كده
تعالى بقى هاتي شنط واهم حاجه يكونوا جداد مفيهمش قطع ولا يدخلوا هوا لجسم السمكة
وحطي اول شنطة فيها السمك وطلعي منها الهوا كويس وبعدين اربطيها كويس جدا
وحطيها جوا شنطة تانية وطبعا برضوا منها الهوا كويس وهكذا على الاقل 7 شنط واقفليها
كويس جدا جدا متنسيش تطلعي الهوا من كل شنطة قبل ما تربطيها
وكل 24 ساعة اقلبي الشنطة على عكس التانية يعني انهارده على وشها بكره على ضهرها
وهكذا ومتفتحيش عليها قبل 15 يوم
لما تفتحي بقى ادعيلي على الطعم وجمال الطعم وهتلاقي اللحم من جوا احمر كده ويجنن
وانضف مليون مرة من اكل برا وبالهنا والشفا يا قمرات
طريقة عمل الفسيخ فى البيت
اسهل طريقة لعمل اروع فسيخ في البيت
طرق عمل الفسيخ في البيت
