كل أم بتحاول تلاقى لبنتها الصغيرة اللى جاية للدنيا اسم رقيق وجميل وكمان له معنى
وعشان كده كتير من الأمهات دى بيدوروا على النت على الأسامى الجديدة كل يوم وبيركزوا
قوى إنها تكون أسامى سهلة فى النطق وخفيفة وكمان معناها حلو

زى اسم أفنان اللى معناه غصون الأشجار وكمان أغادير اللى بيعنى الأنهار أو مجريات الميه
الصغيرة وأريام اللى معناه العسل أو الغزال واسم أسيل اللى معناه الملسا واللينة وبيطلق دائما
على البنت الطويلة

وكمان اسم أبرار اللى معناه الصادقين الطائعين والصالحين ومش بس الأسامى دى اللى بحرف الألف
اللى جديدة وجميلة ورقيقة ده كمان الناس وجدوا أسماء جديدة فى القرآن وبدءوا يسموا بناتهم
بها زى اسم إيلاف اللى ذكر فى سورة قريش وهو مقصود به العهد والتآلف

ولو شفنا بقى الأسماء اللى تبدأ بحرف الباء هنلاقى أسامى جديدة وكمان غريبة يعنى مش
شايعة فى وسط الناس منها اسم بنان وده معناه أطراف الصوابع وكمان اسم بيان اللى
برضه مش منتشر ولا شائع بين الناس وهو معناه الفصاحة والوضوح واسم بيسان اللى هو
اسم أحد المدن الفلسطينية القديمة وآخرهم اسم بسمات وهو جمع بسمة والمعنى طبعا واضح وهو
الضحكة والابتسامة

وفيه كمان اسم ثرى ومعناه الأرض أو التراب اللى فيه ندى واسم جوان اللى معناه
– زى ما قال البعض – إنه نهر فى الجنة وكمان اسم جوزال اللى معناه
الحاجة الكويسة وكمان اسم خنساء واللى هى الشاعرة العربية القديمة والاسم معناه الست اللى عندها
مناخير قصيرة وجميلة

واسم دعد وهى السيدة اللى جسمها مليان وديمة يعنى المطرة الهادية والساكنة يعنى مفيش فيها
رعد ولا برق واسم رسيل اللى معناه الميه الحلوة اللى جاية من الجبال العالية ورذاذ
اللى يعنى الحاجة الخفيفة واللطيفة واسم رونق اللى معناه الحسن والبهاء واسم رتيل وهو اسم
من الأسماء القرآنية الجميلة وزوينة وهى معناه الست الحلوة وزها اللى معناه النور وسديم اللى
هو الضباب الناعم

واسم سفانة بالفاء المشددة ومعناه اللؤلؤة ودى كانت بنت حاتم الطائر واسم سوار اللى معناه
الفارس وسدرة اللى هى شجرة النبق واللى ذكرت فى سورة النجم واسم سجى ومعناه السكون
واللى جاءت فى سورة الضحى

واسم شرمين اللى هى البنت اللى تتسم بالخجل والأدب واسم صحرا وده طبعا مشتق من
كلمة صحراء واسم صوفى واللى معناه الحكمة