شقاوة الطفل بتبقى مطلوبة فى بعض الأحيان بس لما بتبقى الشقاوة بخفة دم ومن غير
ما يسبب أذى لنفسه ولا لأى طفل تانى  وكمان لما بتبقى فى حدود المسموح به

بس فيه أطفال بيعبروا عن شقاوتهم بإنهم يضربوا أصحابهم أو يخربوا فى البيت وهم بيلعبوا
وكمان بتبقى حركتهم كتيرة جدا لدرجة إن الأم ما بتبقاش قادرة عليهم هم دول اللى
بيبقوا المشكلة لإنهم بيسببوا إزعاج لأهاليهم

ومن أهم أسباب الشقاوة اللى بتوصل لدرجة المشكلة هى إن الأطفال دول بيشوفوا أفلام عنيفة
وخصوصا لممثلين هم بيحبوهم علشان كده بيحاولوا يقلدوهم فى تصرفاتهم وكمان الآباء أحيانا بيكونوا سبب
فى تنمية الشقاوة دى عند أطفالهم

بمعنى إنهم بيعاملوهم بشكل سيئ زى إنهم يصرخوا فى وش الطفل وده بيخلى الطفل يخاف
وبالتالى يعبر عن خوفه بإنه يتشاقى زيادة ده غير إن الطريقة دى بتخلى الطفل يفقد
ثقته فى نفسه وبتعمل له مشاكل فى عقله

يبقى لازم الأهل يتكلموا مع الطفل ده بهدوء وباحترام علشان يقدر الطفل يفهم الغلط اللى
هو عمله وكمان لازم نبعد عن الضرب لإن الضرب فى الحالة دى بيسبب العند عند
الطفل ده ويخليه يزود فى شقاوته وكمان لازم لما الأم أو الأب يكلم الطفل إنه
يقعد على ركبه ولازم يكون باصص له علشان ده مش بيخلى الطفل يخاف

وغير كده لازم يبقوا صرحاء مع أطفالهم علشان ينقلوا لهم الأخلاق الكويسة وما ينفعش نعلم
الطفل إنه يكذب وكمان لازم ما نزعقش للطفل وفى نفس الوقت نتكلم معاه بجدية

عقاب الطفل الشقى لو ما قدرناش ننهى شقاوته دى إنه يقعد لمدة معينة بسيطة ممكن
تبقى 5 دقايق فى مكان معين زى أوضته كده ما يتحركش  منها على السرير مثلا
ولو امتثل للعقاب وقعد يبقى خلاص بس لو فضل يعمل تصرفاته الشقية دى يبقى نزود
مدة عزله فى المكان اللى بنحدده يعنى تبقى المدة ربع ساعة أو تلت ساعة وكمان
لازم الأهل يقبلوا اعتذار الطفل ويحضنوه ويبوسوه بعد الاعتذار

وكمان من المهم قوى إنه يتكافئ لو اتصرف بشكل كويس لإن ده هيشجعه يتصرف كويس
على طول وبالتالى نبقى خففنا من حدة الشقاوة وخليناها من الشقاوة اللى بتعمل مشاكل للشقاوة
المسموح بها وأهم حاجة بقى إن الطفل يمارس رياضة علشان يخرج طاقته السلبية عن طريقها

كيف أتعامل مع الطفل الشقى

لو طفلك شقى اعرفى ازاى تتعاملى معاه

طرق للتعامل مع الطفل الشقى